Kalittokai

((Originally extracted from master file ^KALI.OCP))
((Last updated on 2004 April 14th))

• {KALI 16-1} pāṭu iṉṟi pacanta kaṇ paitala paṉi malka
• {KALI 16-2} vāṭupu vaṉappu ōṭi vaṇaṅku iṟai vaḷai ūra
• {KALI 16-3} āṭu eḻil aḻivu añcātu akaṉṟavar tiṟattu iṉi
• {KALI 16-4} nāṭum kāl niṉaippatu oṉṟu uṭaiyēṉ maṉ atu um tāṉ
• {KALI 16-5} tol nalam tolaipu īṅku yām tuyar uḻappa tuṟantu uḷḷār
• {KALI 16-6} tuṉṉi nam kātalar tuṟantu ēkum ār iṭai
• {KALI 16-7} kal micai uruppu aṟa kaṉai tuḷi citaṟu eṉa
• {KALI 16-8} iṉ icai eḻiliyai irappa um iyaivatu ō
• {KALI 16-9} puṉai iḻāy īṅku nām pulampuṟa poruḷ veḵki
• {KALI 16-10} muṉai eṉṉār kātalar muṉṉiya ār iṭai
• {KALI 16-11} ciṉai vāṭa ciṟakkum niṉ ciṉam taṇintīka eṉa
• {KALI 16-12} kaṉai katir kaṉaliyai kāmuṟal iyaivatu ō
• {KALI 16-13} oḷi iḻāy īṅku nām tuyar kūra poruḷ vayiṉ
• {KALI 16-14} aḷi orīi kātalar akaṉṟu ēkum ār iṭai
• {KALI 16-15} muḷi mutal mūḻkiya vemmai tīrntu uṟuka eṉa
• {KALI 16-16} vaḷi tarum celvaṉai vāḻtta um iyaivatu ō
• {KALI 16-17} eṉa āṅku
• {KALI 16-18} cey poruḷ ciṟappu eṇṇi celvār māṭṭu iṉaiyaṉa
• {KALI 16-19} teyvattu tiṟaṉ nōkki terumaral tē moḻi
• {KALI 16-20} vaṟaṉ ōṭiṉ vaiyakattu vāṉ tarum kaṟpiṉāḷ
• {KALI 16-21} niṟaṉ ōṭi pacappu ūrtal uṇṭu eṉa
• {KALI 16-22} aṟaṉ ōṭi vilaṅkiṉṟu avar āḷviṉai tiṟattu ē